جحود الأبناء.. بقلم سمر نديم

شاركت الكاتبة والمبدعة سمر نديم عبر حسابها الشخصي على موقع التواصل الاجتماعي فيسبوك مقال بعنوان جحود الأبناء.

وقالت:

"السماء تبكي .. نعم رأيتها وبكي قلبي معها عندما كذبت عيناي ما تري عندما كذبت أذني ما تسمع إنها قصة عجيبة .. قصة الست فاطمة
فعلاً والله أنا عارفة أنكم مش هتصدقوني بس ده حصل وحصل قدامي وأنا مش عارفة إزاي ده حصل تعالوا معايا وأنا هقولكم القصة من البداية للنهاية
سمعت أن فيه سيدة كبيرة ملقاة في الشارع بدون مأوي فأتجهت ليها علشان أعرف فاكلمتها وعندما أقتربت منها لقيتها سيدة مسكينة .. غلبانة في البرد في الشارع ، قلبي بكي عشانها
أنا مابقدرش أتحمل المنظر ده لكن بتماسك عشان لازم أعمل دوري مابحبش أكون سلبية يعني أنا ممكن أعيط جنبها وخلاص لكن أنا لازم أتدخل عشان أخرجها من الحالة دى أخرجها من الحزن للفرح وأخرجها من التشرد للأمان
لازم أساهم في عمل شئ ودي عادتي أنا أتعودت علي كده .. أتعودت إن أنا أكون إيجابية ماتعودتش أكون سلبية
مع ذلك قلبي بيتقطع لما بشوف المشاهد الصعبة دى
قربت من الست فاطمة وسألتها إيه حكايتك يا ست فاطمة ..
قالتلي أنا ميتة قولتلها إزاي ميتة إنتي عايشة وأنا بتكلم معاكي قالتلي لأ.. أنا ميتة من وجهة نظر الحكومة ومن وجهة نظر بنتي أنا ميتة وبالنسبة لإبني أنا ميتة قولتلها إزاي بس براحة عليا يا ست فاطمة عشان افهم
فاقالتلي بنتي وإبني إتبروا مني ورموني في الشارع وعملولي شهادة وفاة
قولتلها شهادة وفاة! إزاي؟!
عقلي كان هايطير .. قلبى اتحسّر عليا واتأكدت أن الدنيا فعلا بقت غابة
ازاى الكلام ده يحصل؟
سألتها تانى .. إنتِ مُتأكدة؟
إنتي مُتأكدة يا ست فاطمة من الكلام ده؟
يعني فعلاً إبنك عمل كده!
قالتلي والله يابنتي عمل كده طلعولي شهادة وفاة ورموني في الشارع
قولتلها طب وبنتك سكتت؟
قالتلي أيوة سكتت هي كمان موافقة
قولتلها طيب كل ده ليه؟ قالتلي أنا بقيت حمل تقيل عليهم مابقوش عايزين يخدموني حاسين إن أنا بقيت تقيلة اوي وكل واحد ليه ظروفه.. الله يعينهم ويسامحهم
صرخت من غيظى وقولت الله يسامح مين؟؟
ربنا هاينتقم منهم ان شاء الله ولقيت لساني بيقول حسبي الله ونعم الوكيل .. حسبي الله ونعم الوكيل
حضنت فاطمة وقولتها إنسي كل اللي فات إن شاء الله هتكوني معايا وهتبقي سيدة من سيدات القصر
سيدة هيكون ليكي بيت وهيكون ليكي أمان ومأوي وكل حاجة حلوة انتي عاوزاها
فاطمة من سيدات القصر موجودة معانا دلوقتي
بس أنا مش بكتب الرسالة دي دلوقتي أو بحكي الحكاية دي دلوقتي إلا عشان أقولكم إن الزمن صعب جداً وببعت رسالة لكل الأبناء
إنت إزاي تعمل في أمك كده .. إزاي تعمل في أبوك كده يعني إنت ما قرأتش كلام الله إنت ماتعرفش إن ربنا قال ووصينا الإنسان بوالديه حملته أمهُ وهناً علي وهن
إنتوا عارفين وهناً علي وهن يعني ضعف علي ضعف كنت بتاكل منها كنت بتشرب منها ٩ شهور إنت أمانها هي أمانك هي بيتك ولما إتولدت مين اللي رعاك أمك وكانت أحب حاجة للإنسان أمه بجد دي قسوة شديدة جداً جداً
إن شاء الله زي مانتي عملتي في أمك كده ولادك هيعملوا فيكي كده إنتي أديتلهم المثال الحي
مادام إنت عاملت أمك بقسوة ولادك مش هيلاقوا صعوبة إنهم يعملوا كده وكله سلف ودين وحسبي الله ونعم الوكيل
ماكنتش أتوقع أن في يوم من الأيام أن فى وحوش عايشين بيننا
وأن هذا الجاحد الحاقد الغبي الذي تصرف بهذه الوحشية مع أمه
هذه السيدة الغبية اللى هجرت أمها
انتى بتعملى ايه .. انتى فاهمة انتى عملتى ايه ؟
حسبي الله ونعم الوكيل
حسبي الله ونعم الوكيل"